7. Erik Bårdson
Sandvik i Erfjord f. ikr. 1644 vart 3.mann til Guri Pedersdotter. Han var nett på same alder som eldste son hennar. Erik og Guri måtte søkja Kongen om løyve til å gifta seg då mormor hans var søskenbarn til hennar avlidne mann. Slektskapen var nok slik at mormor hans Anna Larsdtr. i Sandvik var dotter av Lars Opsal i Vikedal og mor til Lars Jonson (6) var søster til Lars Opsal.
Guri Pedersdotter døydde i 1667. Skifte 6. febr. 1668. Ho let då etter seg dei før nemnde barn (sjå 5 og 6). Elles var det i buet gardegods i Landsnes og Tjøstheim.
Erik Bårdson g. 2. m. Ingeborg Bjørnsdotter Hidle, dotter til Bjørn Pederson Hidle. Med henne hadde Erik barna:
a.Hermann f. ikr. 1670, bonde Landsnes.
b.Bjørn f. ikr. 1673, bonde Indre Høyvik (sjå I. Høyvik 7).
c.Gabriel f. ikr. 1675, g. m. enka Eli Olsdtr. Jelsa (sjå Jelsa 12), busett Vormestrand i Vikedal.
d.Bård f. ikr. 1677, busett Ytre Høyvik (Høyvik 9).
Erik Bårdson hadde alt i 1665 fått fast bunestad i Landsnes ved makeskiftebrev med stesonen Ola Nilsson mot at Ola skulle få bunestadretten til Solberg i Fister.
Erik kjøper 11. sm. i Landsnes av enka etter Ola Håland Anna Klausdtr. og åtte då truleg alt gods i Landsnes.
Ingeborg Landsnes døydde i 1706 67 år gamal. I 1711 bur Erik som enkemann på Landsnes. Kan ikkje finna han gravlagt i Jelsa, kanskje har presten gløymd å føra han inn i kyrkjeboka, eller og budde han då hjå son sin på Vormestrand.